تیل کی قیمت 18 سال بعد سب سے کم سطح پر

عالمی منڈی میں تیل کی قیمت سنہ 2002 میں اپنی قدر میں مندی سے بھی زیادہ گِر چکی ہے کیونکہ کورونا وائرس کی عالمی وبا کے دوران خام تیل کی مانگ میں ریکارڈ کمی آئی ہے۔ خام تیل کی قیمت اس وقت 23.03 ڈالر فی بیرل ہے۔ یہ نومبر 2002 کی مندی سے بھی کم ہے۔ دوسری طرف امریکی ڈبلیو ٹی آئی کی قیمت 18 سالہ تاریخ کی کم ترین سطح، 20 ڈالر فی بیرل، پر ہے۔ گذشتہ ایک ماہ میں تیل کی قیمتیں نصف سے زیادہ گِر چکی ہیں۔ تیل کی کمپنیوں نے اپنی پیداوار کم کر دی ہے۔ اس ماہ تیل کی مانگ میں کمی کے سلسلے میں سعودی عرب اور روس کے درمیان قیمت طے کرنے کی دوڑ شروع ہوگئی تھی۔ یہ تب شروع ہوا جب سعودی عرب روس کو اس کی پیداوار کی کمی کے لیے رضا مند کرنے میں ناکام ہوگیا تھا۔ تیل برآمد کرنے والے ممالک کی تنطیم اوپیک کے تمام اراکین نے اس پر رضا مندی ظاہر کی تھی۔ ماہرین کا کہنا ہے کہ تیل کی مانگ میں کمی کی بنیادی وجہ کورونا وائرس کا پھیلاؤ ہے۔